फेसबुक अॅप मध्ये दिसणार व्हॉट्सअॅपचे बटण

फेसबुक अॅप मध्ये दिसणार व्हॉट्सअॅपचे बटण...
मटा ऑनलाइन वृत्त । नवी दिल्ली
दिवसातून अर्धाहून अधिक वेळ सोशल मीडियावर घालवणाऱ्या तरुणाईसाठी एक खूषखबर आहे. आता फेसबुकवरील अपडेट बघता बघता तुम्ही व्हॅाट्सअॅपवरील मेसेजसुद्धा वाचू शकणार आहेत. फेसबुकने त्यांच्या अॅपवर एक व्हॅाट्सअॅप बटनचा पर्याय दिला आहे. त्या व्हॅाट्सअॅपच्या बटनावर टॅप करताच थेट व्हॅाट्सअॅप सुरु होणार आहे. सध्या फेसबुक काही देशांमध्ये या बटणाची चाचणी करत आहे. युजर्सच्या प्रतिसादानंतरच फेसबुक ही संकल्पना प्रत्यक्षात उतरवणार आहे.
अमेरिकेतील प्रसिद्ध संकेतस्थळ असलेल्या ‘द नेक्स्ट’ने याबद्दलचे वृत्त प्रसिद्ध केले आहे. कंपनीने फेसबुक फीडमध्ये एक नवीन व्हॅाट्सअॅप बटण दिले आहे, सध्यातरी हे शॅार्टकट बटण काही अॅड्रॉइड फेसबुक अॅपच्या युजर्सच्या फोन मध्ये आहे.
ज्या युजर्सनी त्याची डिफॅाल्ट भाषा डॅनिश ठेवली आहे, त्यानांच ह्या फिचरचा लाभ घेता येणार आहे. अमेरिका आणि पाश्चिमात्य देशांमध्ये असे ही काही नागरिक आहेत जे फक्त फेसबुक व अन्य सोशल नेटवर्किंग साइटचा वापर करतात. त्यामुळे फेसबुकने या भागांमध्ये व्हॅाट्सअॅपचा प्रसार करण्यासाठी या विशेष बटणाची निर्मिती केली आहे.
मात्र व्हॅाट्सअॅप अकाउंट नसणाऱ्या युजर्सने त्या बटणावर टॅप केल्यावर काय होईल याबात अद्याप काहीही स्पष्ट करण्यात आलेले नाही. कदाचित व्हॅाट्सअॅप अकाउंट नसणाऱ्या युजर्सने बटणावर टॅप केल्यास गुगल प्ले स्टोर उघडून तेथून युजर्स व्हॅट्सअॅप डाउनलोड करु शकतात.
फेसबुकने २०१४साली व्हॅाट्सअॅपचे सर्व आधिकार खरेदी केले होते. म्हणूनच व्हॅट्सअॅपचे युजर्स वाढावेत म्हणून फेसबुकने ही शक्कल लढवली आहे.